Bugun Oʻzbekistonda 200 dan ortiq xalqaro delegatlar kambagʻallikka qarshi kurashishni muhokama qilmoqda

Forumda Oʻzbekistondagi mutasaddi tashkilotlarning masʼul mulozimlari hamda BMT, BMTTD, XMT, Jahon banki, YuNICEF, OTB, FTA, GIZ kabi boshqa nufuzli xalqaro tashkilotlar ekspertlari ishtirok etmoqda.

Forum avvalida Oʻzbekiston prezidentining forum qatnashchilariga murojaatini davlat rahbari maslahatchisi Ravshan Gulyamov oʻqib eshittirdi.

Murojaatda taʼkidlanishicha, Oʻzbekiston BMT minbarlaridan bildirgan tashabbuslarining amalga tatbiq etilishi oʻz samarasini bermoqda.

“Bugun Oʻzbekistonda kambagʻallar soni 17 foizdan 14 foizga pasaydi. Bir million fuqaro kambagʻallikdan chiqarilgan. Bu natijalar aholi oʻrtasida kasb-hunar oʻrganish, ish oʻrinlari yaratish, xususiy sektor faoliyatini rivojlantirishga qaratilayotgan izchil iqtisodiy islohotlarning samarasidir.
Shu bilan birga, aholining yordamga muhtoj qatlamlarini qoʻllab-quvvatlashga katta ahamiyat qaratilmoqda” deyiladi murojaatda.

Shuningdek, Oʻzbekiston mahallalaridan 2300 dan ziyod oilaning ijtimoiy himoya ostiga olingani ham diqqatga sazovorligi qayd etildi.

Xalqaro forumning maqsadi – kambagʻallikka qarshi kurashish boʻyicha ilgʻor jahon tajribasi va usullarini oʻrganish, yaqin yillarda koʻp oʻlchovli kambagʻallikka barham berishda muvofiqlashgan kompleks yondashuv, ijtimoiy himoya va manzilli yordamga alohida eʼtibor qaratgan holda amalga oshiriladigan qoʻshma tadqiqotlar uchun ustuvor yoʻnalishlarini shakllantirish, inson kapitalini takomillashtirish orqali mehnat bozorida oʻqitish dasturlari sifatini oshirish, kichik korxonalarning oʻsishini qoʻllab-quvvatlash, yuqori sifatli taʼlim olish imkoniyatlarini kengaytirishdan iborat.