Oʻzbekistonda Oila va xotin-qizlar qoʻmitasidan tavsiyanoma olish uchun arizalar qabuli boshlandi
Hukumat qaroriga muvofiq mutaxassisligi boʻyicha kamida 5 yil mehnat staji mavjud, biroq oliy maʼlumotga ega boʻlmagan xotin-qizlar davlat oliy taʼlim muassasalariga alohida qabul parametrlari (jami 500 ta kvota) doirasida toʻlov-kontrakt asosida oʻqishga qabul qilinishi belgilangan.
Tavsiyanoma olish uchun talabgorlar quyidagi mezonlarning barchasiga muvofiq kelishi kerak:
- oʻrta maxsus yoki professional taʼlim boʻyicha mutaxassislikka ega boʻlishi;
- tavsiyanoma olgunga qadar oliy taʼlim olmaganligi yoki olmayotganligi;
- oʻrta maxsus yoki professional taʼlim mutaxassisligi boʻyicha kamida besh yillik mehnat stajiga ega boʻlishi.
Talabgorlar joriy yilning 1 iyuniga qadar (shu kuni ham) ariza bilan doimiy yashash yoki vaqtincha roʻyxatda turgan joyidagi ishchi guruhlarga murojaat etadi va quyidagi hujjatlarni topshiradi:
- fuqarolik pasporti yoki ID karta nusxasi;
- mehnat daftarchasi (elektron mehnat daftarchasi)dan koʻchirma;
- oʻrta-maxsus yoki professional taʼlim boʻyicha diplom.
Talabgorlar tomonidan taqdim etilgan ariza va hujjatlar oʻrnatilgan tartibda 1-7 iyun kunlari koʻrib chiqiladi va tavsiyanoma berish yoki tavsiyanoma berishni rad etish toʻgʻrisida xulosa qabul qilinadi.
2022-2023-oʻquv yilida tavsiyanoma olgan, biroq oliy taʼlim muassasalarida talabalikka tavsiya etilmagan xotin-qizlarning tavsiyanomalari 2023-2024 yillar uchun ham amal qiladi.