Surxondaryoda IIB xodimi shifoxonada bemorga jismoniy kuch ishlatdi
Prokuratura tergovga qadar tekshiruvni boshladi.
Ijtimoiy tarmoqlarda IIB xodimi tibbiy davolash muassasasida bemorga jismoniy kuch ishlatgani bilan bogʻliq videolavha tarqaldi.
Surxondaryo viloyati prokuraturasi mazkur holat joriy yilning 6 may kuni Surxondaryo viloyati, Muzrabot tumanida sodir boʻlganini tasdiqladi.
Maʼlum qilinishicha, ushbu tumanning “Shaffof” mahallasida yashovchi S. J. tuman IIBga murojaat qilib, shu kuni tumanning “Yangi xayot” mahallasida yashovchi fuqaro U. P. mast holda yashash uyiga kelib uning tinchligini buzayotganligi haqida bergan xabariga asosan profilaktika inspektori borgan vaqtda U.P. voqea joyidan qochib ketgan.
Soʻngra, profilaktika inspektori uni topib, tuman Tibbiyot birlashmasidagi vaqtinchalik mastlik holatida boʻlgan shaxslarga tibbiy yordam koʻrsatish punktiga olib borib joylashtirgan.
Mazkur holat yuzasidan tuman prokuraturasi tomonidan tergovga qadar tekshiruv harakatlari olib borilmoqda.
"Natijasi boʻyicha manfaatdor shaxslarga tergov organi tomonidan qoʻshimcha ravishda maʼlum qilinadi", deyiladi xabarda.