Respublikachilar prezident Baydenni korrupsiyada aloqadorlikda ayblashdi
AQSh Kongressidagi ikki respublikachi FTB va Adliya vazirligidan goʻyo Baydenning jinoiy sxemaga aloqadorligi haqidagi maʼlumotlarni ochiqlashni soʻradi.
Ikki nafar respublikachi kongressmen – Vakillar palatasi nazorat boʻyicha qoʻmitasi raisi Djeyms Komer hamda senator Chak Gressli – AQSh bosh prokurori Merrik Garland va FTB direktori Kristofer Reyga ochiq xat yoʻllashdi.
Ular AQSh prezidenti Jo Baydenning vitse-prezidentlik paytida korrupsion sxemalarga aralashgan boʻlishi mumkinligi haqida anonim maʼlumot olganini taʼkidlamoqda.
Anonim xabarchining maʼlum qilishicha, FTB va Adliya vazirligi ixtiyorida maxfiy boʻlmagan FD-1023 hujjati boʻlib, unda bir xorijlik shaxs pul evaziga Baydendan muhim siyosiy qaror olishga erishgani aks ettirilgan.
Oq Uyning rasmiy vakili Yan Sems respublikachilarni "anonim insinuatsiyalar”da aybladi va bu holatni Respublikachilar partiyasining Bayden va uning oilasiga nisbatan davomiy surishtiruvlari bilan bilan bogʻladi.
Qayd etish joiz, Vakillar palatasi nazorat boʻyicha qoʻmitasi raisi Djeyms Komer Bayden oilasini muntazam ravishda korrupsiyada ayblab keladi.
Komerning bu galgi murojaati – Baydenning oilasi emas, balki uning shaxsan oʻziga nisbatan surishtiruvlar oʻtkazishni talab qilgan birinchi urinishi hisoblanadi, deb yozgan Politico nashri.