Buxoroda soxta aviachiptalarni sotgan shaxs ushlandi
U fuqarolarning ishonchiga kirib, ularga "Samarqand — Moskva" aviareysi elektron chiptasini tayyorlab berishni vaʼda qilib, haqiqiy boʻlmagan elektron chiptalarni taqdim qilish orqali ularning har biridan 2.450.000 soʻmdan pul olgan.
Buxoro viloyatining Peshku tumanida soxta chiptalarni pullagan shaxs ushlandi.
Maʼlum qilishinicha, “Decha“ mahallasida yashovchi 1994 yilda tugʻilgan t.t. qasddan jinoyat sodir qilish yoʻliga oʻtib, 2023 yil 31 mart kuni I.A., hamda I.R. ismli fuqarolarning ishonchiga kirib, ularga "Samarqand — Moskva" aviareysi elektron chiptasini tayyorlab berishni vaʼda qilib, haqiqiy boʻlmagan elektron chiptalarni taqdim qilish orqali ularning har biridan 2.450.000 soʻmdan jami 4.900.000 soʻmlik pul mablagʻlarini aldov yoʻli bilan qoʻlga kiritib, firibgarlik jinoyatini sodir qilgan.
Shuningdek, u oʻz jinoiy harakatlarini davom ettirib, R.Z. ismli fuqaroni ham ishonchiga kirib, unga "Samarqand-Moskva" aviareysi elektron chiptasini tayyorlab berishni vaʼda qilib, haqiqiy boʻlmagan elektron chipta taqdim qilish orqali 2.750.000 soʻm pul mablagʻlarini aldov yoʻli bilan qoʻlga kiritgan.
Mazkur holat yuzasidan Oʻzbekiston Respublikasi Jinoyat kodeksining 168-moddasi 3-qismi bilan jinoyat ishi qoʻzgʻatilib, hozirgi kunda dastlabki tergov harakatlari olib borilmoqda.
