Bir oy avval belgilangan tezlik oʻz kuchida, oʻzgartirishlar kiritilmagan
Ichki ishlar vazirligi Jamoat xavfsizligi departamenti ijtimoiy tarmoq vakillaridan turli taxmin va mish-mishlardan iborat asoslantirilmagan maʼlumotlarni tarqatmaslikni soʻramoqda.
Tarmoqlarda transport vositalari harakatlanishining eng yuqori tezligi soatiga 70 km etib belgilandi mazmunida xabarlar tarqaldi.
Ichki ishlar vazirligi Jamoat xavfsizligi departamenti ushbu xabarlarga munosabat bildirdi.
Unda Oʻzbekiston Respublikasi Prezidentining 2023 yil 28 fevraldagi Farmoniga koʻra, 1 apreldan boshlab Toshkent va Nukus shaharlarida hamda viloyatlar va tumanlarning markazlarida transport vositalari harakatlanishining eng yuqori tezligi soatiga 70 kilometrdan 60 kilometrgacha tushirilishi belgilangani maʼlum qilingan.
Shuningdek, Vazirlar Mahkamasining 2023 yil 3 apreldagi 140-son Qarori bilan Yoʻl qoidalariga oʻzgartirish kiritilgan.
“Ushbu qoida hozir amalda. Ijtimoiy tarmoq vakillaridan turli taxmin va mish-mishlardan iborat asoslantirilmagan maʼlumotlarni tarqatmasliklarini soʻraymiz", demoqda Ichki ishlar vazirligi Jamoat xavfsizligi departamenti Yoʻl harakati xavfsizligi xizmati.