Sirdaryolik xonandani chuv tushirishdi
"Vodiy sadosi" radiosida ishlovchi shaxs sifatida tanishtirib, sirdaryolik xonandaning ishonchiga kirib, firibgarlik yoʻli bilan 2 mln 800 ming soʻm pulni olgan yigit aniqlandi.
Sirdaryolik xonandani chuv tushirgan shaxs aniqlandi. Bu haqda Oʻzbekiston Respublikasi IIV huzuridagi Tergov departamenti xabar berdi.
Maʼlum qilinishicha, joriy yilning 24 mart kuni Sirdaryo tumani A.Temur koʻchasida yashovchi 39 yoshli X.Sh. ariza bilan murojaat qilib, unda nomaʼlum boʻlgan shaxs uning telefon raqamiga qoʻngʻiroq qilib, oʻzini “Vodiy sadosi” radiosida ishlovchi “Muzaffar Ochilov” deb tanishtirgan.
Uning qoʻshiqlarini radioda reklama qilib berish evaziga undan ikki marotaba 1.200.000 soʻmdan jami 2.400.000 soʻm hamda "ZO'R TV" kanaliga chiqarib berish uchun 400.000 soʻm pullarini 9860 60 **** 3895 raqamli plastik kartasiga tashlash yoʻli bilan qoʻlga kiritganligidan soʻng vaʼdasiga koʻra uning qoʻshiqlarini radioda reklama qilib bermasdan aldab ketganligini va uni soʻrab surishtirgan vaqtida oʻzini “Muzaffar Ochilov” deb tanishtirgan shaxs radio sohasida ishlamasligini bilganligini maʼlum qilib, ushbu shaxsni aniqlashda va pullarini undirib berishda amaliy yordam soʻragan.
Olib borilgan tergov-tezkor harakatlari natijasida, “Muzaffar Ochilov” deb oʻzini tanishtirgan shaxs aslida hech qayerda ishlamaydigan, Andijon viloyatida yashovchi 28 yoshli Yu.O. ekanligi aniqlangan.
Mazkur holat yuzasidan Sirdaryo tumani IIB huzuridagi Tergov boʻlimi tomonidan Yu.O.ga nisbatan Oʻzbekiston Respublikasi Jinoyat kodeksning 168-moddasi 3-qismi “b” bandi (firibgarlik) bilan jinoyat ishi qoʻzgʻatilgan.
