Poytaxtda 8-sinf oʻquvchisini “samosud” qilgan qizlar shaxsi aniqlandi
Voqea 10 kun avval sodir boʻlgan. Ijtimoiy tarmoqlar orqali kecha fosh boʻlgan mazkur holat yuzasidan Jinoyat kodeksining 277-moddasi ("Bezorilik") bilan jinoyat ishi qoʻzgʻatilgan.
Jamiyat
22-aprel 2023 yil
![Poytaxtda 8-sinf oʻquvchisini “samosud” qilgan qizlar shaxsi aniqlandi](https://cp.platina.uz/media/CACHE/images/%D0%AF%D0%BD%D0%B3%D0%B8%D1%85%D0%B0%D1%91%D1%82_%D1%83%D0%BA%D1%83%D0%B2%D1%87%D0%B8_%D0%BA%D0%B8%D0%B7111.4f2d64fd55eb.webp)
Toshkent shahar IIBB ning aniqlashicha, voqea joriy yilning 13 aprel kuni taxminan soat 12.30 larda sodir boʻlgan. Tafsilotlarga koʻra, voyaga yetmagan, 2006 yilda tugʻilgan H.S. va 2007 yilda tugʻilgan D.U.lar Yangihayot tumani 8-hududdagi qurilishi tugallanmagan obʼekt hududida jamoat tartibini buzib, jamiyatda yurish-turish qoidalarini qasddan mensimasdan, voyaga yetmagan 2009 yilda tugʻilgan S.X.ni urib, yengil tan jarohati yetkazgan.
Mazkur holat yuzasidan Yangihayot tumani IIO FMB Tergov boʻlimi tomonidan Oʻzbekiston Respublikasi Jinoyat kodeksining 277-moddasi ("Bezorilik") bilan jinoyat ishi qoʻzgʻatilgan. Tergov davom etmoqda.