Imtiyozli kredit mablagʻlarini oʻzlashtirgan AT Xalq banki masʼul xodimi ushlandi
Buxoroda fuqarolarning pulini oʻzlashtirib yuborgan bank xodimi ushlandi. Bu haqda Buxoro viloyati IIB axborot xizmati xabar berdi.
Shofirkon tumani "Joʻshoʻra" mahallasida yashovchi, 1994-yilda tugʻilgan F.Sh. AT Xalq bankining Galaosiyo filialida 2017-yildan 2022-yil oktabr oyiga qadar pensiya va nafaqa tarqatish boʻyicha buxgalter-nazoratchi lavozimida ishlab kelib, 2019-2022-yillar davomida AT “Xalq banki” Galaosiyo filialidan fuqarolar J.J., H.A., S.S. va N.Oʻ.larni aldab, ularning nomiga jami 61,7 mln. soʻmlik kredit mablagʻlarini ajratilishiga erishib, kredit mablagʻlarini oʻz shaxsiy ehtiyojlari uchun ishlatib yuborgan.
Mazkur holat yuzasidan Oʻzbekiston Respublikasi JK.ning 168-moddasi 2-qismi bilan jinoyat ishi qoʻzgʻatilib, hozirgi kunda dastlabki tergov harakatlari olib borilmoqda.
