Namanganda MIB xodimiga pichoq bilan tashlangan shaxsga jinoyat ishi ochildi

Namanganda fuqaro MIB xodimiga pichoq bilan tashlandi.

Aniqlanishicha, davlat ijrochisi S.Badalboyev 10 aprel kuni soat 15:40 larda qarzdor fuqaro O.Toshboyev yashash xonadoniga 26 mln. 982 ming soʻmlik bank krediti va boshqa qarzdorliklarni undirish boʻyicha majburiy ijro harakatlarini amalga oshirish uchun borilgan.

Shu orada davlat ijrochisi xonadonga kelganda qarzdor yoʻqligi maʼlum boʻlgan va telefon orqali kelishni soʻragan. Qarzdor esa turli bahonalar bilan kelmasligini maʼlum qiladi.

Shundan soʻng, davlat ijrochisi qarzdorlik bartaraf etilmagani bois majburiy ijro harakatlari tayinlanganini bildirib kelishini soʻraydi. Bundan gʻazablangan qarzdor O.Toshboyev esa, davlat ijrochisini qasddan oʻldirish maqsadida xoʻjalik pichogʻi bilan kelib, qonuniy faoliyatga qarshilik qilib, davlat ijrochisini koʻkrak qafasiga xoʻjalik pichogʻi bilan urmoqchi boʻlganida, oʻzini himoya qilgan va oʻng qoʻl kaft sohasidan jiddiy jarohat olgan.

Qarzdor yana davlat ijrochisini oʻldirish maqsadida uni ortidan quvgan vaqtda, ijro harakatlarida ishtirok etayotgan boshqa davlat xizmatchilari tomonidan qoʻlidagi xoʻjalik pichogʻi olib qoʻyilishi sababli, jinoyatni oxiriga yetkaza olmaydi.

Mazkur holat boʻyicha 2023 yil 10 aprel kuni Toʻraqoʻrgʻon tuman prokuraturasi tomonidan Jinoyat kodeksining 25, 97-moddasi 2-qismi bilan jinoiy ish qoʻzgʻatilib, hozirda dastlabki tergov harakatlari olib borilmoqda.