Xalq artistining uyida sodir boʻlgan oʻgʻirlik boʻyicha ichki ishlar masʼullari nima deydi?

Maʼlumotlarga koʻra, Malika Ahmedovaning ota-onasidan meros boʻlib qolgan tilla taqinchoqlar, brilliant va boshqa qimmatbaho toshlarni oʻtgan yilning 28 dekabr kuni xalq artistining uyiga oʻgʻri tushib, oʻgʻirlab ketgan.

Xalq artistining aytishicha, oʻgʻrilar tezda topilgan. Ammo qimmatbaho brilliant va tillalar qaytirilmagan. Ularning umumiy qiymati 600 ming dollarga baholangan.

Xalq artisti bu uyushtirilgan, degan gumonda. Bunga esa oʻgʻrilarning ushbu qilmishni sodir etishdan uch-toʻrt kun avval Navoiydagi qamoqxonadan chiqib, poytaxtga kelgani va uning uyiga oʻgʻirlikka tushganini sabab qilgan. Tergovchilarga bu haqda gumonini bildirganida esa, ular oʻgʻirlik sodir etganlar avval shu tumanda yashagan, degan javob bilan kifoyalanishgan.

Tergovchilar oʻgʻrilar bilmasdan qimmatbaho taqinchoqlarni 250 ming soʻmga sotib yuborishganini aytishgan. Jabrlanuvchi ushbu soʻzlarga ishonmayotganini aytmoqda.

Platina.uz ushbu holat boʻyicha Ichki ishlar vazirligidan izoh olishga urindi. Vazirlik matbuot xizmati esa tergovga oid maʼlumotlar va shaxsga oid axborot ochiqlanmasligini bildirdi. Biroq platina.uz Ichki ishlar vazirligi matbuot xizmatiga xalq artistining uyida sodir etilgan oʻgʻirlik va uning oqibatlari boʻyicha ish qayta koʻriladimi-yoʻqmi, yoki bu ish hali jarayondami, “yopilganmi”-yoʻqmi, sudga oshirilganmi kabi savollarni koʻndalang qoʻydi. Chunki bu savollarning javobi na tergov siri hisoblanadi, na shaxsga doir maʼlumot sanaladi.

Vazirlik matbuot xizmati esa bu haqda albatta maʼlumot taqdim etilishini bildirdi.