"Ayiq bilan bogʻliq vaziyatda hech kimga zarar yetmagan" — Tabiat resurslari vazirligi
Ayni paytda taqdim etilgan maʼlumotlarga koʻra Qashqadaryo viloyati Isrofchi tumani Yashnobod mahallasi hududiga Oʻzbekiston Respublikasi Qizil kitobiga kiritilgan qoʻngʻir ayiq tushib kelgan.
Hozirda ayiq tumanning Yashnabod MFY Beshchashma hududidan oqib oʻtuvchi Qumdaryo daryosiga yaqin hududdagi jarlikda hosil boʻlgan gʻor ichiga kirib olgan.
Ushbu hudud Tabiat resurslari vazirligi Qashqadaryo viloyat boshqarmasi va tuman hokimligi mutasaddilari, tuman ichki ishlar, Milliy gvardiya va Favqulodda vaziyatlar boʻlimlari xodimlari tomonidan muhofazaga olinib, aholi va qoʻngʻir ayiqning xavfsizligi taʼminlangan.
Mazkur hududga vaziyatni bartaraf etish maqsadida Toshkent hayvonot bogʻi mutaxassislaridan iborat guruh jalb qilingan.
"Ayiq bilan bogʻliq vaziyatda hech kimga zarar yetmagan. Holat boʻyicha qoʻshimcha maʼlumot beriladi" deya xabar qilgan vazirlik.