Toshkentda 4 ta gaz "zapravka" 7 mlrd soʻmlik tabiiy gaz talon-toroj qilgani aniqlandi
Toshkent shahridagi 4 ta AGTKSh tomonidan 7,1 mlrd soʻmlik tabiiy gaz talon-toroj qilgani aniqlandi. Bu haqda Energetika vazirligi xabar berdi.
Maʼlum qilinishicha, 13-29 mart kunlari «Oʻzenergoinspeksiya» va huquqni muhofaza qiluvchi organlar bilan hamkorlikda Toshkent shahrida oʻtkazilgan nazorat tadbirlarida tadbirkorlik subʼektlariga qarashli 4 ta avtomobillarga gaz toʻldirish kompressor shoxobchasi (AGTKSh) tomonidan tabiiy gazdan noqonuniy foydalanish holatlari aniqlandi.
Mazkur noqonuniy holatlar natijasida davlat manfaatlariga yetkazilgan umumiy zarar miqdori 7,1 mlrd soʻmni tashkil etgan. Jumladan:
- Yunusobod tumanida joylashgan AGTKSh tomonidan 2,372 mlrd soʻmlik;
- Sergeli tumanida joylashgan AGTKShda 1,728 mlrd soʻmlik;
- Mirzo Ulugʻbek tumanida joylashgan AGTKShda 1,607 mlrd soʻmlik;
- Uchtepa tumanida joylashgan AGTKShda tabiiy gazdan noqonuniy foydalanish natijasida davlat manfaatlariga yetkazilgan zarar miqdori 1,392 mlrd soʻmni tashkil etgan.
Ushbu noqonuniy holatlarga huquqni muhofaza qiluvchi organlar tomonidan huquqiy baho berilmoqda. Hududlarda nazorat tadbirlari davom ettirilmoqda.