Uch kunlik komadan hayotga qaytgan tikuvchi

Bolalikdan chevarchilikka qiziqishi boʻlsa-da, ota-onasi oʻqituvchi boʻlishini xohlagan Toshkent viloyati Yangiyoʻl tumanida yashovchi Dilnoza Muhammadaliyeva ichki xohish-istaklariga qarshi bora olmadi.
U qoʻli gul chevar. Bugun koʻplab shogirdlari eʼzozida boʻlgan qahramonimiz bundan 2 yil oldin avtohalokat sabab jiddiy jarohat olgan.
Uch kunlik komadan keyin oʻziga kelgach, uning qaysidir bir imkoniyati cheklansa-da, boshqa bir tarafdan omad eshiklari ochildi.
Dilnoza Muhammadaliyeva nafaqat oʻzi, balki singlisi, kelini va qizini ushbu kasbga oʻrgatgan.
"Baʼzi bir insonlarning jahli chiqmasin, ammo qishloq aholisi shaharliklarga qaraganda mehnatkash boʻladi" deydi tikuvchi ayol. Taqdir zarbalariga harakat va ishonch bilan qarshi chiqa olgan zamondoshimiz tikuvchilik ortidan topmadim deganda 3 mln. soʻm daromad qiladi. Hatto boshqalarning ham daromad topishiga koʻmaklashyapti.
Xastalanib oʻtgan kunlarini yodga olar ekan, bugunini eng yaxshi kuni, deb biladi yangiyoʻllik zamondoshimiz.