1 mlrd soʻmga kelishilgan “xizmat”ning 700 mln soʻmini olayotgan favqulodda vaziyatlar xodimi ushlandi – DXX
Davlat xavfsizlik xizmati joylarda noqonuniy yer maydonlarini sotish holatlarini aniqladi.
Jumladan, Nurota tuman favqulodda vaziyatlar boʻlimi xodimi dehqonchilikka ixtisoslashgan fermer xoʻjalik rahbari bilan oʻzaro til biriktirib, ushbu xoʻjalikning 80 gektar yer maydonini xaridorga 1 mlrd. soʻmga sotishga kelishib, oldindan 700 mln. soʻm olgan vaqtlarida ushlandi.
Andijon shahridagi qurilish firmasi rahbari shahar hokimligi zaxirasida boʻlgan 14 sotix yer maydonini goʻyoki oʻziga tegishli ekanini aytib, rasmiylashtirib berish evaziga 40 ming AQSh dollari olgan vaqtida ushlandi.
Samarqand tumanida yashovchi fuqaro tuman hokimining tegishli qarori bilan unga dehqon xoʻjaligi tashkil etishi uchun berilgan 35 sotix yer maydonini xaridor nomiga rasmiylashtirib berish evaziga 45 ming AQSh dollari talab qilib, oldindan 25 ming AQSh dollari olgan vaqtida ushlandi.
Hozirda mazkur shaxslarga nisbatan Jinoyat Kodeksining tegishli moddalari bilan jinoyat ishlari qoʻzgʻatilib, tergov harakatlari olib borilmoqda.