Toshkentda rahbarining qariyb 4 mlrd soʻmini oʻzlashtirgan bosh hisobchi ushlandi

Toshkent shahar Yashnobod tumanida korxona bosh hisobchisi rahbarining 3,9 milliard soʻmini oʻzlashtirib olgani aniqlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.

Bosh prokuratura huzuridagi departamentning Yashnobod tuman boʻlimi tomonidan tadbirkorlik subʼektlarining huquqlarini himoya qilish yuzasidan oʻtkazilgan tergovga qadar tekshiruvda aniqlangan. “S.G.” MChJ bosh hisobchisi Ye.K. tijorat banki filialidan bank-mijoz dasturidan foydalanish uchun ushbu MChJga berilgan elektron kalitdan foydalanib, oylik ish haqidan tashqari qoʻshimcha 3,9 milliard soʻmini oʻziga avans sifatida hisoblagan va plastik kartasiga oʻtkazish yoʻli bilan talon-toroj qilgan.

Mazkur holat yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) bilan jinoyat ishi qoʻzgʻatilib, tergov harakatlari oʻtkazilmoqda.