Tashqi mehnat migratsiyasi agentligi rahbari hibsga olingani tasdiqlandi
Tashqi mehnat migratsiya agentligi rahbari Afzal Ermatov Jinoyat kodeksining 205-moddasida (Hokimiyat yoki mansab vakolatini suiisteʼmol qilish) nazarda tutilgan jinoyatni sodir etishda gumonlanmoqda. U ehtiyot chorasi sifatida qamoqqa olingan.
OAVda maʼlumotlar tarqalgach, tashqi mehnat migratsiyasi agentligi holatga munosabat bildirdi.
"Mavjud maʼlumotlarga koʻra, agentlik boshligʻi A.Ermatovga huquqni muhofaza qiluvchi idoralar tomonidan Oʻzbekiston Respublikasi Jinoyat Kodeksining tegishli moddalari boʻyicha ayb eʼlon qilinib, hibsga olingan.
Hozirda uning xatti-harakatlari yuzasidan tergov ishlari olib borilmoqda", - deyiladi xabarda.
Eslatib oʻtamiz, Afzal Ermatov 2010 yildan 2013 yilgacha Tashqi mehnat migratsiyasi agentligida rahbar boʻlib ishlagan. Keyinchalik 2022 yilning martidan yana ushbu lavozimga qaytgandi.