Bosh prokuratura tomonidan bir guruh mansabdorlarga qarshi jinoyat ishi qoʻzgʻatildi
Bosh prokuratura tomonidan sobiq Toshkent shahar madaniyat bosh boshqarmasida oʻtkazilgan oʻrganishda Oʻzbekiston Respublikasining "Davlat xaridlari toʻgʻrisida"gi Qonun talablari buzib kelingani aniqladi.
Xususan, Toshkent shahar madaniyat bosh boshqarmasi tomonidan yuqoridagi Qonun talablari buzilib, tender tanlovlari oʻtkazilmasdan, festival tadbirlarini oʻtkazish uchun turli firmalar bilan 20 mlrd. soʻmlik toʻgʻridan-toʻgʻri shartnomalar tuzilgan.
Ushbu festivallar 2022 yilning may-sentabr oylarida amalda oʻtkazib boʻlingan boʻlsada, qonun buzilishlarni yashirish maqsadida "etender.uzex.uz" maxsus axborot portaliga 24 oktabr va 3 noyabr kunlari poytaxtda 5 ta festival tadbirlarini oʻtkazish haqida nomigagina eʼlon va hujjatlar joylashtirilgan hamda shartnomalar tuzilgan.
Oʻtkazilgan festivallar doirasida ham amalda bajarilmagan ishlar va koʻrsatilmagan xizmatlar uchun 8 mlrd. soʻmlik byudjet mablagʻlari talon-toroj qilingani aniqlangan.
Tekshirish natijasiga koʻra, Toshkent shahar madaniyat bosh boshqarmasi mansabdor shaxslari va boshqalarga nisbatan jinoyat ishi qoʻzgʻatilib, hozirda tergov harakatlari oʻtkazilmoqda.
