«Dok-1 Maks»ni ishlab chiqargan Hindiston kompaniyasining litsenziyasi bekor qilindi
Hindiston hukumati Oʻzbekistondagi bolalar oʻlimiga sabab boʻlgan “Dok-1 Maks” dori vositasini ishlab chiqaruvchi "Marion Biotech" kompaniyasi litsenziyasini bekor qildi.
Maʼlum qilinishicha, Hindistonning Uttar Pradesh shtati narkologiya va litsenziyalash departamenti Marion Biotech kompaniyasining litsenziyasini bekor qilgan. "Marion Biotech" kompaniyasining yoʻtalga qarshi siropi "Dok-1" Oʻzbekistonda 18 bolaning oʻlimiga sabab boʻldi. Oʻtgan yili dekabr oyida sodir boʻlgan voqea sabab Hindistonda tergov boshlangan edi.
"Ularning litsenziyasi yanvarda vaqtincha toʻxtatilgandi. Endi butunlay bekor qilindi. Ular sirop ishlab chiqara olmaydi", — deyilgan hukumat bayonotida.
Eslatib oʻtamiz, avvalroq Hindiston hukumati «Dok-1 Maks» dorisini ishlab chiqargan kompaniyaga qarshi ish ochgani haqida xabar bergandik. Shuningdek, Marion Biotech kompaniyasining 3 nafar xodimi hibsga olingani haqida maʼlum qilgandik.