Parkentda kuchli yomgʻir oqibatida 47 kishi adirda qolib ketdi

Joriy yilning 20 mart kuni respublikamizning ayrim hududlarida kuchli yomgʻir yogʻishi kuzatildi. Bu haqda FVV xabar berdi.

Toshkent viloyati Favqulodda vaziyatlar boshqarmasiga fuqarolar tomonidan kelib tushgan xabarga koʻra, Parkent tumani, Qiziltogʻ shaharchasi atrofidagi adirliklarga oʻz avtomobillarida dam olish maqsadida borgan fuqarolar kuchli yomgʻir yogʻishi natijasida adirliklarda qolib ketganligi va pastga tushaolmayotganliklarini aytib, ularga yordam kerakligini maʼlum qilganlar.

Xabarga asosan, aytilgan manzilga zudlik bilan qutqaruvchilar 7 ta maxsus texnika bilan yetib borib, qidiruv-qutqaruv ishlarini olib borganlar.

Amalga oshirilgan tezkor saʼy harkatlar natijasida qutqaruvchilar tomonidan dam oluvchilarning 13 ta yengil turdagi avtoulovlari hamda 47 nafar fuqaro xavfsiz joyga olib tushilgan.

Yuzaga kelgan vaziyat oqibatida halok boʻlgan va tan jarohat olgan fuqarolar yoʻq.