Xokkey boʻyicha Oʻzbekiston yoshlar terma jamoasi Osiyo va Okeaniya chempioni boʻldi
Xokkey boʻyicha 18 yoshgacha boʻlgan Oʻzbekiston oʻsmirlar terma jamoasi Osiyo va Okeaniya U-18 chempionati gʻolibiga aylandi. Musobaqa Moʻgʻuliston poytaxti Ulan-Bator shahrida 11−17 mart kunlari boʻlib oʻtdi.
Oʻzbekiston yoshlar terma jamoasi Turkmaniston (5:0), Eron (14:1), Moʻgʻuliston (7:4), Tailand (10:2) va Birlashgan Arab Amirliklari (8:1) jamoalarini magʻlub etdi. Shu tariqa, vakillarimiz musobaqa gʻolibligini qoʻlga kiritdi.
Terma jamoa sardori Jasurbek Rustamxonov turnir toʻpurari boʻldi. U beshta oʻyinda 26 (14 gol va 12 golli uzatma) ochko toʻplagan.