“Oilaviy zoʻravonlikning oqibatlari emas, aksincha sabablari bilan kurashish zarur” — Saida Mirziyoyeva
Prezident administratsiyasining shoʻʼba mudiri Saida Mirziyoyeva BMT Taraqqiyot dasturining Oʻzbekistondagi doimiy vakili bilan oilalardagi zoʻravonlikning oldini olishga qaratilgan qonun loyihasi yuzasidan suhbatlashgan.
Uchrashuv davomida jamiyatning eng ogʻriqli, shuningdek, dolzarb masalalaridan biri – oilalardagi zoʻravonlikni kriminallashtirish va bunday holatlarning oldini olishga qaratilgan, hozirda Oliy Majlis muhokamasida boʻlgan tegishli qonun loyihasi borasida oʻzaro fikr almashilgan.
"Men doim gender zoʻravonlikning sabablarini tushunishga, izlashga harakat qilaman, chunki faqatgina uning tub mohiyatini anglash, bunday hodisalar nega sodir boʻlishini bilish orqali uning ildiziga bolta urish, bunday shafqatsizlikni bartaraf etish mumkin, deb oʻylayman. Shu nuqtai nazardan, Dimovska xonimga oilaviy zoʻravonlikning oqibatlari emas, aksincha sabablari bilan kurashish zarurligi borasidagi mulohazalarim bilan boʻlishdim. Uchrashuvda, shuningdek, xotin-qizlarning iqtisodiy salohiyatini rivojlantirish uchun qoʻshimcha imkoniyatlar yaratish rejalarini ham muhokama qildik", - deydi Mirziyoyeva.
