SSV tizimida bir qator rahbar xodimlar ishdan olindi

Sogʻliqni saqlash vaziri Amrillo Inoyatov rahbarligida oʻtgan Hayʼat yigʻilishida bir qator rahbar xodimlar ishdan olindi. Bu haqda SSV matbuot xizmati xabar berdi.

Maʼlum qilinishicha, berilgan topshiriq va vazifalar hamda qoʻyilgan talablarni oʻz vaqtida bajarmagani sababli «O‘zmedimpeks» MChJ direktori A.Nabiyev, Bolalar milliy tibbiyot markazi direktori vazifasini vaqtincha bajaruvchi A.Sharipov egallab turgan lavozimidan ozod qilindi.

Shuningdek, oʻz yoʻnalishida yetarli natija koʻrsata olmagani bois vazirlikning Dori vositalari va tibbiy buyumlar va jihozlar muomalasini tartibga solish va muruvvat yordamini muvofiqlashtirish boshqarmasi boshligʻi X.Ganiyeva hamda yana bir qator masʼullar ham ishdan olingani maʼlum qilindi.

Vazirning tegishli buyrugʻi bilan Investitsiya va grant loyihalarini muvofiqlashtirish boshqarmasi boshligʻi vazifasini bajarib kelgan N.Rasulov ham ishdan boʻshatilgan.