Oksana Chusovitina Jahon kubogida kumush medalga sazovor boʻldi
Sport gimnastikasi boʻyicha Oʻzbekiston terma jamoasi aʼzosi Oksana Chusovitina Bokuda oʻtayotgan Jahon kubogining uchinchi bosqichini ham medal bilan yakunladi. Bu haqda Milliy Olimpiya qoʻmitasi xabar berdi.
Oʻzbekistonlik atlet tayanib sakrash dasturida kumush medalni qoʻlga kiritdi. Ikki urinish natijasiga koʻra, 47 yoshli Oksananing chiqishi hakamlar tomonidan 13.433 ball bilan baholandi. U faqatgina fransiyalik Kolin Devallardan kamroq ball toʻpladi.
Shu tariqa sportchi qatorasiga uchinchi bor Jahon kubogida shohsupaga koʻtarilmoqda. Bundan avvalgi bosqichlarda u bronza medallariga sazovor boʻlgandi.
Tayanib sakrash, ayollar:
- Kolin Devallar (Fransiya) — 13.683;
- Oksana Chusovitina (Oʻzbekiston) — 13.433;
- Linmin Yu (Xitoy) — 13.383.