Konstitutsiya yangilanyapti, u qabul qilingan kun ham oʻzgaradimi?

Bir yildan buyon muhokama qilingan yangilanayotgan Konstitutsiya loyihasi haqida soʻnggi qarorlarga nihoyat yaqin keldik.

Oliy Majlis Qonunchilik palatasida kecha boshlanib bugun yakuniga yetgan “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasi muhokamasi tarixiy yigʻilish deya baholandi. Ana shu tarixiy yigʻilish yakuniga koʻra deputatlar 3 muhim qarorni qabul qilishdi:

1. “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasi maʼqullandi.

2. Referendumni 2023 yil 30 aprel - yakshanba kuni oʻtkazish belgilandi.

3. Loyihaning amaldagi Konstitutsiyaga muvofiqligini aniqlash uchun Konstitutsiyaviy sudga yuborildi.

Oliy Majlis Qonunchilik palatasi Spikerining oʻrinbosari, Konstitutsiyaviy komissiya matbuot kotibi Odiljon TOJIYeVning maʼlum qilishicha, Konstitutsiya qabul qilingan kun anʼanaviy 8 dekabrligicha qoladi.