Oʻzbekiston ijtimoiy davlat deb eʼlon qilinmoqda
Yangilanayotgan Konstitutsiyada Oʻzbekiston ijtimoiy davlat deb eʼlon qilinmoqda. Bunda fuqarolarning ijtimoiy jihatdan ehtiyojmand toifalari uy-joy bilan taʼminlanishi, mehnatga haq toʻlashning eng kam miqdori insonga munosib yashashini taʼminlashni hisobga olgan holda belgilanishi, fuqarolarning tibbiy yordamning kafolatlangan hajmini davlat hisobidan olishga haqliligi va boshqalar belgilanmoqda. Boshqacha aytganda, ijtimoiy davlatga xos boʻlgan barcha elementlar Konstitutsiyamizda aks ettirilmoqda.
Shuningdek, muhokama jarayonida qayd etilishicha, nogironligi boʻlgan shaxslarni davlat tomonidan qoʻllab-quvvatlashni nazarda tutuvchi qoidalar yanada takomillashtirilgan. Jumladan, davlat nogironligi boʻlgan shaxslarning ijtimoiy, iqtisodiy hamda madaniy sohalar obʼektlari va xizmatlaridan toʻlaqonli foydalanishi uchun shart-sharoit yaratishi, ularning ishga joylashishiga, taʼlim olishiga koʻmaklashishi, zarur axborotni toʻsqinliksiz olish imkoniyatini taʼminlashi mustahkamlanmoqda.
Eslatib oʻtamiz: ayni paytda Qonunchilik palatasida aholining 220 mingdan ziyod takliflari asosida Yangilanayotgan Konstitutsiyaning muhokamasi boʻlib oʻtayotgani haqida avvalroq xabar qilgandik.
