Oʻzbekistonda davlat xizmatchilari asosan qanday kasalliklarga chalinishi maʼlum qilindi

Qoraqalpogʻiston Respublikasi Vazirlar Kengashi va barcha hokimliklarda faoliyat yuritayotgan jami 5744 nafar davlat fuqarolik xizmatchisi tibbiy koʻrikdan oʻtkazildi. Bu haqda Davlat xizmatini rivojlantirish agentligi axborot xizmati xabar berdi.

Koʻrik Cogʻliqni saqlash vazirligi hamda hokimliklar bilan hamkorlikda oʻtkazilgan. Xizmatchilar 10 dan ortiq turdagi birlamchi tibbiy koʻrikdan oʻtdi.

Tibbiyot xodimlarining xulosalariga koʻra, hokimlik xodimlari oʻrtasida ovqat hazm qilish organlari (surunkali gastrit), yurak qon tomir (arterial gipertoniya), asab tizimi (osteoxondroz), koʻz va endokrin (qandli diabet va semizlik) kabi kasalliklar aniqlandi.

Kasallik aniqlangan xodimlarga davolanishi uchun barcha zarur shart-sharoitlarni yaratish choralarini koʻrish boʻyicha Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga tegishli koʻrsatmalar yuborildi, jarayon davom etmoqda.

Eslatib oʻtamiz, “Davlat fuqarolik xizmati toʻgʻrisida”gi qonunda davlat fuqarolik xizmatchisiga tibbiy xizmat koʻrsatish ijtimoiy himoya chorasi sifatida kafolatlangan.