27-fevral, 2023

9 ming dollar pora sabab Ohangaron prokuraturasi tergovchisiga jinoyat ishi qoʻzgʻatildi

Bosh prokuratura 26 fevral kuni huquqni muhofaza qiluvchi organlar xodimlari tomonidan tezkor tadbir oʻtkazilgani haqida xabar qildi. Bosh prokuratura axborot xizmati rahbari Hayot Shamsutdinovning Platina.uz ga maʼlum qilishicha, tadbirda Ohangaron shahar prokuraturasi binosini qoʻriqlash xizmatini olib boruvchi qorovuli shahar prokuraturasi tergovchisining ish yurituvida boʻlgan jinoyat ishi doirasida tergovga jalb qilingan fuqaro E.dan jinoyat ishini yengillashtirib, ijobiy hal qilib berish evaziga 9.000 AQSh dollarini olgan vaqtida ushlangan. 27 fevral kuni Ohangaron shahar prokuraturasi tergovchisiga nisbatan Jinoyat kodeksining 210-moddasi, qoʻriqlash xizmati qorovuliga nisbatan Jinoyat kodeksining 168, 28-211-moddalari bilan jinoyat ishi qoʻzgʻatilgan. Gumonlanuvchi shaxslar protsessual tartibda ushlangan. Tergov harakatlari olib borilmoqda.