25-fevral, 2023

Turkiyaga qutqaruv ishlari uchun ketgan oʻzbekistonlik FVV xodimlari qaytib keldi

Turkiyada 18 kunlik qidiruv-qutqaruv ishlaridan soʻng Oʻzbekiston Favqulodda vaziyatlar vazirligi otryadi Toshkentga qaytib keldi. Maʼlum qilinishicha, 6 fevral kuni Turkiyaning janubiy-sharqiy viloyatlarida dahshatli zilzila sabab oʻn minglab insonlar halok boʻldi. Oʻzbekiston Prezidenti topshirigʻiga koʻra, Favqulodda vaziyatlar vazirligining 100 kishidan iborat qidiruv-qutqaruv guruhi tabiiy ofat oʻchogʻi, yaʼni Hatay viloyatiga joʻnatildi. "Otryadimiz ishtirokidagi qutqaruv operatsiyasi 2 haftadan koʻproq davom etdi va shu vaqt ichida yigitlar vayronalar ostidan 18 nafar tirik odam va 200 ga yaqin jasadlarni olib chiqdilar. Bugun bizning qahramonlarimiz uyga qaytishdi", - deyiladi xabarda. Toshkent xalqaro aeroportida Oʻzbekiston Favqulodda vaziyatlar vazirligi xodimlarini ommaviy axborot vositalari, jamoatchilik vakillari, Favqulodda vaziyatlar vaziri va boshqa rasmiy shaxslar kutib oldi.