25-fevral, 2023

Samarqanddagi «metan zapravka»da Nexia-3 portlab ketdi

Samarqanddagi gaz quyish shoxobchasida Nexia-3 mashinasiga oʻrnatilgan gaz ballonida chaqnash sodir boʻldi. Bu haqda viloyat IIB xabar berdi. Maʼlum qilinishicha, 25 fevral kuni soat 11:00 larda Samarqand shahar Hunarmandlar MFY Bedil koʻchasida joylashgan «Kamalak» MChJga qarashli avtomobillarga siqilgan gaz quyish shoxobchasida, shoxobcha ishchisi Pastdargʻom tumani Gulobod MFYda yashagan, 1980 yilda tugʻilgan M.Z., ushbu shoxobchaga siqilgan gaz quyish maqsadida kelgan haydovchi 1994 yilda tugʻilgan H.D. boshqaruvida boʻlgan Nexia-3 rusumli avtomashinaga gaz quyayotganda, bagaj qismiga oʻrnatilgan gaz balonining yorilib ketishi natijasida chaqnash sodir boʻlgan. Hodisa oqibatida MChJ ishchisi M.Z. kuyish jarohatlari olib, voqea joyida vafot etgan. Mazkur holat yuzasidan dastlabki surishtiruv ishlari olib borilmoqda.