21-fevral, 2023

7 ta viloyatda qor koʻchish xavfi eʼlon qilindi

24-26 fevral kunlari A-373 «Toshkent – Oʻsh» avtomobil yoʻlining Qamchiq dovonidan oʻtgan qismida qor yogʻishi, vaqti-vaqti bilan kuchli yogʻingarchilik, tuman tushishi kuzatilishi, koʻrinuvchanlik 50 metrgacha pasayishi hamda shamol tezligi 15-20 metr/sekundgacha kuchayishi, shuningdek, yoʻllarda yaxmalak va qor uyumlari yuzaga kelishi mumkin. Bu haqda «Oʻzgidromet» xabar berdi. Shuningdek, 21-28 fevral kunlari kutilayotgan yogʻingarchilik hamda havo haroratining sezilarli oʻzgarishlari sababli respublikaning togʻli hududlarida qor koʻchish xavfi mavjud. Xususan: Qashqadaryo viloyati: Kitob va Shahrisabz tumanlarida; Surxondaryo viloyati: Sariosiyo va Boysun tumanlarida; Samarqand viloyati: Samarqand va Urgut tumanlarida; Jizzax viloyati: Zomin va Baxmal tumanlarida; Toshkent viloyati: Parkent, Ohangaron, Boʻstonliq tumanlarida va Chotqol tizmasining Chimyon togʻlarida; Namangan viloyati: Pop tumanida; Fargʻona viloyati: Soʻx va Fargʻona tumanlarida qor koʻchish xavfi elon qilindi. Togʻli xududlarda istiqomat qiluvchi fuqarolar, dam oluvchilar hamda togʻli xududlarda harakatlanuvchi haydovchilardan ehtiyotkorlik choralarini koʻrish soʻralgan.