16-fevral, 2023

Hafta oxiriga qadar vodiyda “gaz zapravka”lari faoliyati tiklanishi mumkin

Hafta oxirida vodiy viloyatlaridagi AGTKShlarning bosqichma-bosqich faoliyatini tiklash choralari koʻrilmoqda. Bu haqda Energetika vazirligi matbuot xizmati xabar berdi. Maʼlum qilinishicha, koʻrilayotgan choralar natijasida hafta oxirlariga borib vodiy viloyatlaridagi gaz quvurlarida tabiiy gaz bosimining koʻtarilib borishi kutilmoqda. Shu bois mahalliy hokimliklar bilan kelishilgan holda avtomobillarga gaz toʻldirish kompressor shoxobchalari (AGTKSh) gaz bosimining koʻtarilishiga qarab, ularning faoliyati bosqichma-bosqich tiklanishi rejalashtirilgan.

«Shuni alohida taʼkidlash kerakki, gaz bosimi pasaygan kunlarda birinchi navbatda aholi va ijtimoiy soha obʼektlari (issiqlik elektr stansiyalar, shifoxonalar, maktabgacha va maktab hamda oliy taʼlim muassasalari va boshqalar)ni elektr energiyasi va tabiiy gaz bilan bir maromda taʼminlash zarur hisoblangani sababli AGTKShlar faoliyatiga majburiy cheklovlar kiritilgan», deyiladi xabarda.

Quvurlarda gaz bosimini bir meʼyorga keltirish va ushbu meʼyorni saqlab turish uchun AGTKShlar qisqa vaqt oraligʻida reja-grafik asosida faoliyat yuritib boradi.