16-fevral, 2023

Afgʻonistonda buyuk shoirimiz Alisher Navoiy yodgorliklariga zarar yetkazilganligiga oydinlik kiritildi

Oʻzbekiston Tashqi ishlar vazirligi matbuot kotibi Ahror Burxonov Afgʻonistonda mashhur oʻzbek shoiri Alisher Navoiy yodgorligi buzib tashlangani haqida tarqalgan xabarlarga munosabat bildirdi. “Afgʻonistonda buyuk shoirimiz Alisher Navoiy yodgorliklariga zarar yetkazilgani haqidagi xabarlarni qaygʻu bilan qabul qildik. Ushbu masala yuzasidan diplomatlarimiz Afgʻoniston vakillari bilan bogʻlandi. Ularning taʼkidlashicha, ushbu vandalizm holati qardosh Oʻzbekiston bilan koʻp asrlik doʻstona munosabatlarni mustahkamlash tarafdori boʻlgan muvaqqat hukumat rasmiy siyosatini aks ettirmaydi, nomaʼlum shaxslarning oʻzboshimchalik va oʻylamasdan qilgan harakati natijasi boʻlib, umumiy tarixiy va madaniy merosimizga zarar yetkazadi. Afgʻoniston vakillari yodgorliklarni tiklash va umumiy merosimizga hurmat bilan munosabatda boʻlish choralarini koʻrishini maʼlum qildilar”, deb yozgan Burxonov.