Oʻzbekistonda 11 mingdan ortiq obʼektlar belgilangan normalarga toʻgʻri kelmagan holda qurilgan

Respublika hududlari seysmik ball koʻrsatkichlari boʻyicha zonalarga boʻlingan boʻlib, obʼektlarni joylashtirishda mazkur seysmik ball koʻrsatkichlari inobatga olinadi. Bu haqda AOKAda oʻtkazilgan brifingda vazirlik axborot xizmati rahbari Saidnosir Usmonov xabar berdi.

"Obʼektni loyihalashtirishdan oldin u joylashgan yer maydoni boʻyicha topografik tasvir va geologik tadqiqot amalga oshiriladi. Grunt tarkibi va xususiyatlari, sizot suvlar sathi va shu kabi boshqa masalalar ham oʻrganiladi. Ushbu tadqiqot natijalaridan kelib chiqqan holda, obʼektni joylashtirish, uning qavatlar soni, fundamenti, konstruksiyalari va gabarit parametrlari boʻyicha loyiha yechimlari tanlanadi. Mazkur jarayonlardan keyin obʼektlar boʻyicha loyiha hujjatlari ishlab chiqiladi. Soʻngra vakolatli ekspert tashkilotlari tomonidan ekspertizadan oʻtkaziladi. Bunda ham seysmik xavfsizlik va mustahkamlik masalalari boʻyicha alohida koʻrib chiqiladi. Ijobiy ekspertiza xulosalari olingach, qurilish ishlarini boshlashga ruxsat beriladi", - deydi Saidnosir Usmonov.