Kamoliddin Rabbimov: “Suriya xalqiga ham yordam berish choralarini topishsa, yanada yaxshi boʻlardi”
“Maʼlumotlarga koʻra, zilzila qurbonlari soni 8 mingga yaqin, omon qolganlarni topishga umid kamaymoqda. Turkiya va Suriyadagi zilzilaning oqibatlari koʻpchilik oʻylagandan koʻra kattaroq va fojialiroq ekani maʼlum boʻlyapti. Turkiyaning oʻzida vafot etganlar soni, kechagi maʼlumotlarga koʻra besh ming atrofida ekan. Lekin, hali aksariyat buzilgan uylarning ostidagi odamlar chiqarilgani yoʻq, shuning uchun ular tiriklar yoki vafot etganlar safiga qoʻshilmagan. Euronews’ning aytishicha, vafot etganlar soni sakkiz baravar koʻp boʻlishi mumkin ekan. Qiyoslash uchun, 1966 yilda Toshkentdagi juda koʻplab uylarning buzilishiga sabab boʻlgan zilzilaning kuchi 5.2 bal boʻlgan ekan. Maʼlumotlarga koʻra, oʻshanda sakkiz inson vafot etgan, yuzlab odamlar jarohatlangan. Turkiyadagi zilzila esa 7.2-7.8 balni tashkil qilgan, yer bir necha marta takroriy qimirlagan. Mana shu fojia fonida, koʻplab davlatlar qatori, Oʻzbekiston ham yuzdan ortiq qutqaruvchini, besh-oltita kinologdan iborat guruhni yuborgani – biroz boʻlsa-da taskin beradi. Oʻzbekistonning, turkiy davlatlarning yordami, boshqalarnikidan koʻp boʻlsa boʻlishi kerak, lekin kam emas. Imkon topib, Suriya xalqiga ham yordam berish choralarini topishsa, yanada yaxshi boʻlardi. Balki, Suriyaga ham yordam berilayotgandir, men bexabardirman...” deb yozgan u oʻzining ijtimoiy tarmoqdagi sahifasida.
