07-fevral, 2023

Davlat dasturi loyihasi: oʻz vaqtida olinmagan pensiyalarni toʻlash muddati 12 oydan 24 oyga uzaytiriladi

Joriy yilning 6 fevralidan boshlab 17 fevraliga qadar jamoatchilik muhokamasiga havola etilgan Davlat dasturi loyihasida pensionerlar uchun ham muhim yangilik oʻrin olgan. Yaʼni 2024 yil 1 yanvardan pensionerga hisoblangan, lekin oʻz vaqtida olinmagan pensiyani toʻlash muddati 12 oydan 24 oyga uzaytirilishi nazarda tutilgan. Maʼlum qilinishicha, natijada 2,4 ming nafardan ortiq fuqaroga 21,7 mlrd soʻm miqdordagi pensiya toʻlab berilishi imkoniyati yaratiladi. Shuningdek, nogironlikni belgilashda fuqarolarga qoʻshimcha yengilliklar yaratish maqsadida 2023 yil 1 martdan boshlab nogironlik idoralararo elektron maʼlumotlar almashinuvi asosida fuqarolar kasalligining ogʻirligi va uning asoratlaridan kelib chiqib ularning ishtirokisiz belgilanadi. Natijada yillik 27 ming nafar fuqaro (25 foiz) tibbiy-ijtimoiy ekspert komissiyasiga bormaydi va ularga nogironlik sirtdan belgilanadi. Nogironlikni belgilashda davolash muassasalaridan kasallik tarixi koʻchirmalari elektron qabul qilinadi (Toshkent shahrida aprobatsiyadan oʻtkazilgan) hamda ushbu maʼlumotlar asosida nogironlik fuqarolarning ishtirokisiz belgilanadi.