04-fevral, 2023

Toshkentda bola oʻgʻrilari paydo boʻlgani haqidagi xabar rad etildi

Ijtimoiy tarmoqlarda goʻyoki maktab oʻquvchilarini oʻgʻirlashmoqchi boʻlishayotganligi haqida asossiz xabarlar tarqalmoqda. Ichki ishlar vazirligi holatga oʻz munosabatini bildirdi. Maʼlum qilinishicha, 1 fevral kuni Shayxontohur tumanida 113-sonli maktabning 11-sinf oʻquvchisi F.N. boshqaruvidagi avtomashinaga 132-sonli maktab oʻquvchilari G.B. va S.N. lar yerdagi muz boʻlagini tepgan. Shundan soʻng 11-sinf oʻquvchilari muz boʻlagini tepgan bolalarni ichki ishlarga olib boramiz deb ularni ogʻzaki qoʻrqitishgan. Bolalar boshqa bunday qilmasligini aytib uyiga ketishgan. Hozirgi vaqtda bolalar sogʻ-salomat ota-onasi bagʻrida. Avtomashinani boshqarish huquqi boʻlmagan maktab oʻquvchilarining ota-onasi bilan birga huquqbuzarlikka yoʻl qoʻymaslik yuzasidan profilaktik suhbat oʻtkazilgan.