31-yanvar, 2023

Oʻzbekiston 2022 yilning eng yaxshi shaxmat mamlakati deb topildi

Oʻzbekistonlik shaxmatchilarning soʻnggi bir yil davomida xalqaro arenalardagi sensatsion gʻalabalari ortidan Oʻzbekiston – yilning eng yaxshi shaxmat mamlakati deb eʼtirof etildi. Niderlandiyadagi xalqaro turnir yakunida Nodirbek Abdusattorov va Javohir Sindorov yilning eng yaxshi shaxmat mamlakatiga topshiriladigan «Tour D'or» - «Oltin minora» sovrinini qabul qilib olishdi. Oʻzbekiston shaxmat federatsiyasiga Yevropaning shaxmat sovrinini fransiyalik mashhur grossmeyster Bashar Kuatli topshirdi. Shuningdek, «Tata Steel Chess-2023» musobaqasida Nodirbek Abdusattorovga magʻlubiyatga uchragan norvegiyalik Magnus Karlsen 2022 yilning eng yaxshi shaxmatchisi deb topildi. Hindistonlik Dommaraju Gukesh esa 2022 yilning eng yaxshi yosh shaxmatchisi deb eʼlon qilindi. U 2022 yilgi shaxmat Olimpiadasida Nodirbek Abdusattorovga magʻlubiyatga uchragandi. Har ikki shaxmatchi «Tour D'or» sovrinlariga ega chiqdi. Eslatib oʻtamiz, 2022 yilda Hindistonning Chennay shahrida boʻlib oʻtgan 44-Butunjahon shaxmat Olimpiadasida Oʻzbekiston birorta ham magʻlubiyatga uchramagan yagona jamoa boʻlib, 188 jamoa ishtirok etgan Olimpiada chempioniga aylangandi. Natijada, ilk marta oʻzbekistonlik 4 shaxmatchi FIDE reytingida TOP-100talikdan joy olgandi.