29-yanvar, 2023

Nukusdagi koʻp qavatli uyda gaz portladi

Bugun, 29 yanvar kuni soat 16:15 atrofida Nukus shahri «Temir jol» MFYda joylashgan 4 qavatli uyda havo-gaz aralashmasining chaqnashi sodir boʻldi. Bu haqda Oʻzbekiston favqulodda vaziyatlar vazirligi matbuot xizmati xabar berdi. Natijada, uydagi bir nechta xonadonlarning tom va pol qismlari oʻpirilib, 4-qavatdan 1-qavatgacha tushib ketgan. Shuningdek, voqea natijasida 2 nafar fuqarolar yengil tan jarohati bilan shahar shifoxonasiga joylashtirilganligi bildirilgan edi, ikkala jabrlangan fuqarolar zaruriy tibbiy hamda psixologik yordamni olishgan va ayni vaqtda ular shifoxonadan chiqarilgan. Ayni vaqtda Favqulodda vaziyatlar vazirligi va tegishli idoralar tomonidan binoning qulagan konstruksiyalarini tozalash ishlari olib borilmoqda. Hodisa joyiga Qoraqalpogʻiston Joʻqorgʻi Kengesining raisi Amanbay Orinbayev va Vazirlar Kengashi raisi Farxod Ermanov yetib bordi.

"Vaziyat Favqulodda vaziyatlar vaziri tomonidan nazoratga olingan. Hodisa yuzasidan qoʻshimcha maʼlumot taqdim etiladi", — deyiladi xabarda.