27-yanvar, 2023

Fargʻonadan Qirgʻizistonga mikroavtobus qatnovi qayta tiklandi

26 yanvardan eʼtiboran «Fargʻona – Quvasoy – Qizil-qiya» xalqaro yoʻnalishida mikroavtobus qatnovi qayta tiklandi. Bu haqda Transport vazirligi matbuot xizmati xabar berdi. Fargʻona va Qirgʻizistonning Batken viloyatidagi Qizil-qiya shahri oʻrtasida amalga oshiriladigan mazkur qatnov ikki chegaradosh viloyat oʻrtasidagi bordi-keldi uchun muhim yoʻnalishlardan biri hisoblanadi. 2020 yilgacha mavjud boʻlgan mazkur qatnov, pandemiya davri cheklovlarida toʻxtab qolgan edi. Qirgʻiziston tomonidan «Qizil-qiya PATP», Oʻzbekiston tomonidan esa «Daewoo Trans Servis» MChJ xizmat koʻrsatuvchi yoʻnalish umumiy masofasi 39,5 kmni tashkil etib, yoʻlkira narxi 12 ming soʻm etib belgilandi. Mikroavtobuslar Qizil-qiya va Fargʻonadan tongi soat 7:20 da harakat boshlanishi nazarda tutilgan. Kelgusida aholi talab va ehtiyojlarini inobatga olgan holda qatnovlarni koʻpaytirish rejalashtirilmoqda.