Bugun kim zoʻr?

#Mitti_feleton

Bolaligimda onam aytib bergan bir ertak esimdan chiqmaydi. Muzga toyib oyogʻi singan qirgʻovul bir necha narsalar va jonivorlarni: “Sen nedan zoʻrsan?” deya savolga tutadi. Soʻralganlarning bari oʻzidan kuchli narsani aytib, ojizligini tan oladi. Masalan, Azim Suyun sheʼrga solganday:

- Oʻt aka, oʻt aka,

Sen nedin zoʻrsan?

- Vah, men zoʻr boʻsam,

Qoʻyga jemish boʻlarmidim?

Bu yil shu savol berilsa, QAHRATON AKA: “Eh-o, men zoʻrman-da!” deya javob bergan boʻlardi.

     - MEN ZOʻR BOʻLMASAM, gazlar pasayib ketib, odamlar sovuqqa qotarmidi?  Xalq gaz oʻrniga tezak-chalma yoqarmidi?

     - MEN ZOʻR BOʻLMASAM, rahbarlar butun aybni ob-havo injiqligiga yoʻyib, suvdan quruq chiqishga harakat qilarmidi?

      - MEN ZOʻR BOʻLMASAM, yoqilgʻi quyish shoxobchalarida mashinalar navbati 4-5 kilometrga choʻzilib ketarmidi?

 - MEN ZOʻR BOʻLMASAM, yoʻlkiralar ikki baravarga oshib ketarmidi? (Guliston shahar avtobusiga chiqsam, kira haqi 100 foiz oshganligiga guvoh boʻldim. Zero, ular yoʻnalishni tenderda yutganlarida kira haqi qatʼiy belgilab qoʻyiladi. Nega, ular oʻzboshimchalik bilan kira haqini ikki baravar oshirishayapti? Mahalliy hokimlik qayerga qarayapti?)

Qirgʻovul qarasa, QAHRATON zabtiga olayapti. Savol berganiga pushaymon boʻlib, oʻsha joyning oʻzida QAHRATONGA qarab qichqirib yuboribdi:

- EH-O, SEN ZOʻRSAN-DA! EH-O, SEN ZOʻRSAN-DA!

Uzunquloq gaplarga qaraganda, bu muammoni hal qilishga hukumatning koʻzi yetmasligini bilgan QIRGʻOVUL QUYoSh BOBONI IZLAB KETGAN EMISh.

  Muhammadali AHMAD