26-yanvar, 2023

Namangan va Samarqandda tadbirkorlar jami 3 mlrd soʻmga yaqin kredit pulini oʻzlashtirgan

Namangan va Samarqand viloyatlarida korxona rahbarlari imtiyozli kredit mablagʻlarini oʻzlashtirgani aniqlangan. Bu haqda Bosh prokuratura huzuridagi Departament xabar berdi. Namangan viloyatining Norin tuman boʻlimi tomonidan oʻtkazilgan tergovga qadar tekshiruvda, “O.P.” MChJ rahbari A.X attraksion jihozlarini olish uchun tijorat banki filialidan ajratilgan imtiyozli kredit evaziga 228,8 ming AQSh dollarlik jihozlarini sotib olmasdan, kredit mablagʻini “R.I.” xorij kompaniyasi orqali naqdlashtirib olib oʻzlashtirganligi aniqlangan. Shuningdek, Samarqand viloyati Urgut tuman boʻlimi tomonidan oʻtkazilgan tergovga qadar tekshiruvda, “Z.J.” MChJ rahbari S.B. issiqxona qurish uchun tijorat banki filialidan ajratilgan imtiyozli kredit mablagʻi evaziga xarid qilingan 416 mln soʻmlik metall buyumlarini naqd pulga sotib, kredit mablagʻini oʻzlashtirish yoʻli bilan talon-toroj qilganligi aniqlangan. Mazkur holatlar yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) bilan jinoyat ishlari qoʻzgʻatilib, tergov harakatlari oʻtkazilmoqda.