25-yanvar, 2023

Shaxmat: Nodirbek Abdusattorovda ham, Javohir Sindarovda ham durang!

Niderlandiyaning Veyk-an-Zeye shahrida shaxmat boʻyicha nufuzli «Tata Steel Chess» turniri davom etmoqda. Bugun turnirning «Masters» guruhida 10-tur doirasida Nodirbek Abdusattorov dunyo shaxmat reytingida 2-oʻrinni band qilgan xitoylik Ding Liren bilan durang natija qayd etdi. Durang natija qayd etgan Nodirbek Abdusattorov 7 ochko bilan peshqadamligini saqlab qoldi. Niderlandiyalik Anish Giri AQSh grossmeysteri Uesli So bilan durang oʻynadi va 6,5 ochko bilan ikkinchi oʻrinda qoldi. «Chellenjer» guruhida 10-turda Javohir Sindarov (2654) ham durang natija qayd etdi. Hamyurtimiz niderlandiyalik Ervin LAmiga qarshi qora donalarda oʻynab, murosa koʻchasini tanladi. Hozircha Javohir 6,5 ochko bilan turnir jadvalida 3-oʻringa koʻtarilib oldi.