25-yanvar, 2023

Boks boʻyicha Oʻzbekiston ayollar jamoasi Osiyo chempionatida birinchi oʻrinni egalladi

Tailand poytaxti Bangkok shahrida 22 yoshgacha boʻlgan bokschilar oʻrtasida Osiyo chempionati oʻz yakuniga yetib bormoqda. Bugun, 25 yanvar kuni musobaqa doirasida qizlar oʻrtasida final bahslari boʻlib oʻtdi. Final bahsida 8 nafar bokschimiz ringga koʻtarildi. Ularning besh nafari gʻalaba qozonib, oltin medalga sazovor boʻldi. Uch bokschimiz finalda imkoniyatni boy berdi va kumush medal bilan yurtimizga qaytadi. Yana ikki nafar bokschimiz bronza medalini qoʻlga kiritgandi. Shu tariqa, oʻzbekistonlik qizlar boks boʻyicha umumjamoa hisobida 1-oʻrinni egalladi. Osiyo chempionati-U22da quyidagi bokschilarimiz sovrindor boʻlishdi: Oltin medal: -48 kg: Farzona Fozilova -50 kg: Sabina Boboqulova -52 kg: Feruza Kazakova -54 kg: Nigina Oʻktamova -66 kg: Navbahor Hamidova Kumush medal: -57 kg: Sitora Turdibekova -70 kg: Aziza Zokirova -75 kg: Sohiba Roʻzmetova Bronza medal: -63 kg: Ziyoda Yarasheva -81 kg: Sahobat Husanova Maʼlumot uchun, Oʻzbekiston ayollar jamoasi musobaqaga 11 nafar bokschi bilan yoʻl olgandi. Yigitlar oʻrtasida final bahslari ertaga, 26 yanvar kuni oʻtkaziladi va unda 10 nafar bokschimiz finalda ringga koʻtariladi.