20-yanvar, 2023

Oʻzbekiston Tojikistondan qoʻshimcha elektr import qilishni boshladi

Anomal sovuq davrida Surxondaryo viloyatida aholi va ijtimoiy soha obʼektlarini uzluksiz elektr energiyasi bilan taʼminlash maqsadida qoʻshni Tojikiston Respublikasidan qoʻshimcha elektr energiyasi yetkazib berish yoʻlga qoʻyildi. Bu haqda Hududiy elektr tarmoqlari» Surxondaryo hududiy filiali matbuot xizmati xabar berdi. 18 yanvar kuni Shoʻrchi, Oltinsoy, Qumqoʻrgʻon, Jarqoʻrgʻon tumanlarining 70 foiz, Bandixon, Qiziriq, Sherobod tumanlarining 90 foiz va Boysun tumanidagi elektr energiya isteʼmolchilari Sariosiyo, Uzun, Denov tumanlari qatori Tojikiston Respublikasining “Regar-500” podstansiyasidan chiquvchi 220kVli L-Regar-Zarchop va L-Regar-Sherobod elektr uzatish tarmoqlari orqali kuchlanish bilan taʼminlandi. Viloyatimizning Termiz, Jarqoʻrgʻon tumanlarining 30 foizi, Muzrabot, Angor, Sherobod tumanlarining 10 foizi hamda Termiz shahrining elektr energiya isteʼmolchilari 196 MVt yuklama bilan Oʻzbekiston Respublikasi orqali kuchlanish bilan taʼminlanmoqda. Tojikiston Respublikasining “Regar-500” podstansiyasidan chiquvchi 220kVli L-Regar-Zarchop va L-Regar-Sherobod elektr uzatish tarmoqlarining har biridagi simning yuklamani koʻtarish qobiliyati 250 MVtga moʻljallangan boʻlib, L-Regar-Zarchop va L-Regar-Sherobod elektr uzatish tarmoqlarining birortasi favqulotda oʻchib qolish holatlari yuz bergan vaqtlarda energosistemani saqlab qolish maqsadida Shoʻrchi, Oltinsoy, Qumqoʻrgʻon, Jarqoʻrgʻon, Bandixon, Qiziriq, Sherobod, Boysun, Sariosiyo, Uzun, Denov tumanlari boʻyicha Janubiy mintaqaviy dispetcherlik boshqarmasi dispetcherlarining topshirigʻi va Surxondaryo hududiy dispetcherlik boʻlimi dispetcherining farmoyishi bilan tumanlarning oʻzidan tasdiqlangan cheklash grafigiga asosan 6-10 kVli fiderlardan soatiga 70-80 MVt dan cheklash olib borish taqazo etiladi.