19-yanvar, 2023

Kutilmagan xushxabar: shifokorlar yurtimizda ilk bor siam egizaklarini ajratib olishdi

Sogʻliqni saqlash vaziri Amrillo Inoyatov Respublika perinatal markazi qoshidagi Neonatal xirurgiya oʻquv-davolash-metodik markazida operatsiya natijasida ajratib olingan bolalar holidan xabar oldi. Vazir qirgʻizistonlik egizaklarning onasi va buvisi bilan suhbatlashib, oʻzbekistonlik mutaxassislar malakasiga ishonch bildirgani uchun ularga minnatdorlik soʻzlarini bildirdi. Oʻz navbatida, bolalarning buvisi Xatira Primova va onasi Zohida Mirzaakbarova ham vazirga hamda butun oʻzbek shifokorlariga oʻz tashakkurini aytdi: — Oʻsh shahridan keldik. U yerda homilamda muammo borligini aniqlashganda bizni Bishkekka yuborishgan. Tugʻuruqdan 10 kun oʻtgach, bolalarimning yashab qolish imkoni umuman yoʻqligi aytishib, uyga ruxsat berishdi, — dedi egizalklarning onasi. — Fotima-Zuhramning yashab ketishidan umid uzolmas edik. Shuning uchun Baxtiyor Ergashevga telefon orqali murojaat qildik. — Mana, tugʻilganida hech kim yashab ketishiga ishonmagan nabiralarim 7 oylik boʻldi. Bunga, avvalo, Allohning marhamati, soʻngra oʻzbekistonlik shifokorlarning mahorati sabab, — dedi bolajonlarning buvisi. — Oʻz kasbining haqiqiy fidoyilari boʻlgan, ishini vijdonan va halol bajarayotgan shifokorlarga rahmat aytaman. Vazir aytganidek, nabiralarim kelajakda shunday qoʻli yengil shifokor boʻlishini niyat qildik.