13-yanvar, 2023

Senator Enaxon Siddiqova vafot etdi

Oliy Majlis Senati aʼzosi – Oʻzbekiston xalq shoiri Enaxon Siddiqova shu yilning 13 yanvar kuni 68 yoshida vafot etdi. Bu haqda OʻzA xabar berdi. «Doʻstlik», «El-yurt hurmati» ordenlari sohibi Enaxon Siddiqova 1954 yil 28 avgustda Fargʻona viloyati Oltiariq tumanida tavallud topgan. U 1976 yil Fargʻona davlat institutining filologiya fakultetini tamomlagan. Oltiariq va Fargʻona tumanlari maktablarida oʻqituvchi, maktab direktori vazifalarida ishlagan. «Fargʻona haqiqati», «Ferganskaya pravda» gazetasi, Fargʻona viloyati hokimi oʻrinbosari kotibiyatida faoliyat olib borgan. Enaxon Siddiqovaning «Qorakoʻz turnalar», «Sumanbar nasim», «Koʻngil ufqlari», «Ishq ifori» kabi sheʼriy toʻplamlari, «Sirli tun faryodi» hikoyalar majmuasi, «Qizoyimlarga kelinlik saboqlari», «Tibbiyot fidoyilari», «Xaloskorlik», «Eʼzozli ayollar» kabi publitsistik asarlari nashr etilgan.