13-yanvar, 2023

Qashqadaryoda gaz zapravka 752 mln soʻmlik elektrdan noqonuniy foydalangani aniqlandi

Qashqadaryo viloyatining Yakkabogʻ tumanida faoliyat yuritib kelayotgan «Adiba» MChJga qarashli avtomobillarga gaz toʻldirish kompressor shoxobchasida elektr energiyasidan noqonuniy foydalanish holati aniqlandi. Bu haqda Energetika vazirligi xabar berdi. Maʼlum boʻlishicha, mazkur shoxobcha haqiqiy isteʼmol qilgan elektr energiyasi sarfini yashirib, oylik hisobotlarni kamaytirib koʻrsatib kelgan. Shuningdek, shoxobcha oʻziga tegishli transformatorni oʻzboshimchalik bilan (elektr taʼminoti korxonasi bilan kelishmasdan) almashtirgan. Oqibatda hisobga olinmagan elektr energiyasi boʻyicha 752 million soʻm miqdorida qayta hisob amalga oshirildi. Ushbu hajmdagi elektr energiyasi oʻrtacha 8,3 mingta xonadonning bir oylik isteʼmoli hisoblanadi. Qoidabuzar isteʼmolchiga nisbatan belgilangan tartibda choralar koʻrilib, tegishli hujjatlar huquqni muhofaza qiluvchi organlarga taqdim etildi.