13-yanvar, 2023

Oʻzbekiston TIV Afgʻonistondagi terakt boʻyicha bayonot berdi

Oʻzbekiston Respublikasi Tashqi ishlar vazirligi Kobuldagi terrorchilik harakati yuzasidan bayonot eʼlon qildi. “Joriy yilning 11 yanvar kuni Kobul shahrida Afgʻoniston Tashqi ishlar vazirligi binosi yaqinida sodir etilgan terrorchilik xurujini keskin qoralaymiz”, — deyiladi xabarda. Ushbu qabih harakat koʻplab insonlar, asosan, tashqi siyosat idorasi xodimlari orasida qurbonlarga sabab boʻlgan. Vazirlik halok boʻlganlarning oila aʼzolari va yaqinlariga chuqur hamdardlik bildirib, jarohatlanganlarning tezroq sogʻayib ketishini tilagan. Maʼlumot uchun, 11 yanvar Kobuldagi Afgʻoniston Tashqi ishlar vazirligi binosiga kirishda xudkush terrorchi oʻzini portlatib yuborgan. Natijada 12 kishi halok boʻlgandi.