07-yanvar, 2023

Ikkita vazirlik birlashsa, xodimlar oldingi lavozimiga teng boʻlgan lavozimlarga tanlovsiz ishga qabul qilinishi mumkin

Maʼmuriy islohotlar natijasida davlat organlari va tashkilotlarining tuzilmalari qayta koʻrib chiqilayotganligi sababli Davlat fuqarolik xizmatchilari vakant lavozimlarining yagona ochiq portali (vacancy.argos.uz) orqali eʼlon qilingan tanlovlarning barcha jarayonlari vaqtinchalik toʻxtatilgan. Davlat organlari va tashkilotlarining tashkiliy tuzilmalari hamda shtat birliklari qayta tasdiqlangandan soʻng vakant lavozimlarga tanlovlar oʻrnatilgan tartibda yanada takomillashtirilgan vacancy.argos.uz portali orqali eʼlon qilinadi va davom ettiriladi. Bunda, lavozimi teng joyga va lavozimidan pastga ishga oʻtayotganlar uchun tanlov boʻlmaydi. Yaʼni, ikkita vazirlik birlashsa, uning xodimlari oldingi lavozimiga teng boʻlgan lavozimlarga tanlovsiz ishga qabul qilinishi mumkin. Shuningdek, agarda siz faoliyat yuritayotgan tashkilotga xodimlar ochiq tanlovsiz ishga qabul qilinayotgan boʻlsa yoxud egallab turgan lavozimingiz qisqarayotganini roʻkach qilib sizdan asossiz ravishda ishdan boʻshash haqida ariza talab qilishayotgan boʻlsa, bizga murojaat qiling, deyiladi Davlat xizmatini rivojlantirish agentligi xabarida .